Ministrja e Arsimit, Shkencës dhe Teknologjisë, Arbërie Nagavci, ka listuar disa të mira që janë identifikuar nga Komisioni Evropian për vitin 2021 në fushën e arsimit.
Nagavci ka përmendur rritjen e pjesëmarrjes së fëmijëve në arsim, financimin e qendrave mësimore për fëmijët e komuniteteve, si dhe transparencën në institucionet e arsimit të lartë si disa nga vlerësimet e Komisionit, njofton Klankosova.tv.
“Disa nga këto përmirësime pozitive janë rezultat i punës sonë që kur e kemi marrë mandatin. Ashtu siç edhe jemi të vetëdijshëm, raporti konstaton se cilësia e arsimit mbetet e dobët dhe ka ende shumë punë për të bërë në fushën e arsimit. Megjithatë, ne mbesim të përkushtuar për të përmirësuar këto gjetje në planifikimet tona për vitin e ardhshëm”, ka shkruar Nagavci.
“Ne do të angazhohemi maksimalisht në përmirësimin e cilësisë në arsim në të gjitha nivelet dhe në mirëplanifikim e zbatim të reformave përmbajtësore e gjithëpërfshirëse”.