TIRANË, 7 nëntor /ATSH/ – Aleanca Evropiane e Agjencive të Lajmeve (EANA), ku Agjencia Telegrafike Shqiptare është anëtare me të drejta të plota, dënoi sulmin e fundit që ka shkaktuar dëme të konsiderueshme në zyrën e agjencisë franceze të lajmeve, AFP, në qytetin e Gazës më 2 nëntor.
Bordi i EANA, mbështet CEO-n e kësaj agjencie, Fabrice Fries, gjithashtu president i EANA-s, në denoncimin e tij ndaj këtij akti skandaloz.
”Është shqetësuese kur infrastruktura e masmedias synohet në këtë mënyrë, aq më tepër kur vendndodhja e zyrës njihej mirë. Për fat të mirë, për shkak të masave paraprake të ndërmarra nga AFP, të gjithë anëtarët e stafit në qytetin e Gazës nuk u dëmtuan pasi ata ishin evakuuar”, tha sekretari i përgjithshëm i EANA-s, Alexandru Giboi.
Kjo situatë e vështirë nënvizon rëndësinë e mbrojtjes së gazetarëve të cilët ofrojnë një shërbim të paçmuar në përcjelljen e lajmeve për komunitetin global.
EANA u kërkon të gjitha palëve të respektojnë gazetarët dhe të garantojnë sigurinë e tyre.
Ne qëndrojmë në solidaritet me AFP-në dhe të gjitha mediat që përballen me kërcënime të ngjashme dhe vazhdojmë të avokojmë për promovimin e një klime të sigurt në të cilën mund të zhvillohet gazetaria e besueshme, thotë në reagimin e tij bordi i EANA-s./ a.jor.