Dronët, ashtu siç është paralajmëruar prej kohësh, po kthehen në një element kyç të luftës moderne, e pas Ukrainës, kjo situatë vihet re dhe në Jemen.
Rebelet atje shpesh kanë përdorur edhe pajisjet pa pilotë për të kryer sulme në Detin e Kuq, por Shtetet e Bashkuara së fundi i paraprinë goditjet e tyre. Forcat amerikane rrëzuan gati 10 dronë që po përgatiteshin të sulmonin objektiva në zonë. Valën e tyre të sulmeve me dronë e raketa ndaj anijeve tregtare në Detin e Kuq dhe Gjirin e Adenit, rebelët Huthi e kanë justifikuar si reagim ndaj operacioneve ushtarake të Izraelit në Gazë dhe si shfaqje solidariteti me palestinezët. Dhe këto sulme nuk kanë qenë pa pasoja, pasi ato kanë arritur t`i shkaktojnë probleme të mëdha transportit detar.
Shtetet e Bashkuara dhe Britania reaguan duke e rikthyer organizatën në listën e “grupeve terroriste”, e duke u angazhuar kundër sulmeve të rebelëve në rajon. Vetëm një ditë më parë, Houthit shënjestruan një “anije tregtare amerikane” në Gjirin e Adenit, disa orë pasi qëlluan me raketa destrojerin amerikan Gravely.
Sulmet e rebelëve Houthi ndaj anijeve në Detit të Kuq kanë ngadalësuar tregtinë midis Azisë dhe Evropës dhe kanë shkaktuar frikë lidhur me zinxhirët e furnizimit global. Fuqitë botërore janë të shqetësuara se lufta në Gazë mund të shtrihet e të kthehet në një konflikt tejet të rrezikshëm rajonal.
Top Channel
