LONDËR, 15 prill /ATSH-DPA/ – Sekretari i Jashtëm britanik, David Cameron, i kërkoi Izraelit të jetë i zgjuar dhe këmbëngulës në mospërshkallëzimin e konfliktit me Iranin.
”Izraeli duhet ta njohë sulmin e Teheranit si një dështim pothuajse total dhe të mendojë me kokën dhe zemrën e tij”, theksoi Cameron.
Ai konfirmoi se avionët britanikë të RAF rrëzuan “një numër të vogël” dronësh të lëshuar nga Irani në atë që ishte sulmi i tij i parë i drejtpërdrejtë ushtarak në tokën izraelite.
Sulmi i paprecedentë nga Irani, që besohet të jetë si hakmarrje për një sulm ndaj një kompleksi diplomatik iranian në Siri në fillim të këtij muaji, ka ngritur frikën se lufta midis Izraelit dhe Hamasit mund të kthehet në një zjarr më të gjerë rajonal.
Cameron, duke folur përpara një deklarate parlamentare nga kryeministri Rishi Sunak mbi këtë çështje, i bëri jehonë komentit të presidentit amerikan Joe Biden se Izraeli duhet ta shohë mbrojtjen e suksesshme kundër raketave dhe dronëve iranianë si një fitore./ /os/
