Xhiro e 28-të në Albi Mall Superligë vazhdon sot me tre ndeshje që janë në program për tu zhvilluar.
Padyshim që vëmendja e adhuruesve të futbollit kosovar do të jetë në stadiumin ‘Zahir Pajaziti’ në Podujevë, ku në fushë zbresin dy pretendentët për titull të kampionit, Llapi dhe Drita.
Llapjanët janë lider në Superligë me 54 pikë, derisa Drita ndodhet në pozitën e tretë me tre pikë më pak.
Të besuarit e Tahir Batatinës kërkojnë vetëm fitoren nga kjo përballje në mënyrë që ta ruajnë pozitën e parë, por edhe të krijojnë distancë me Dritën.
Në anën tjetër Drita e Zekirija Ramadanit synon që të rikthehet te fitoret pas dy barazimeve të njëpasnjëshme.
Kampioni në fuqi i Kosovës, Ballkani ka punë të lehtë para adhuruesve të vet pasi pret Lirinë e Prizrenit në një ndeshje që pritet ta fitoj lehtësisht, pasi prizrenasit tanimë janë të fundit në tabelë dhe thuajse pa gjasa për të shpëtuar.
Sfidë tejet interesante pritet të zhvillohet edhe në Drenas, ku Feronikeli ’74 është nikoqir i Prishtinës.
Vendasit kërkojnë fitoren për t’i ikur pozitës së barazhit, derisa kryeqytetasit synojnë tre pikët për t’iu afruar edhe më shumë pozitës së katërt në tabelë.
Të tre duelet e ditës së sotme në elitën e futbollit kosovar fillojnë nga ora 15:00.
