Red Bull Leipzig shpërdoron një shans të artë për t’u ngjitur në zonën Champions pasi është mposhtur në javën e 32-të nga Monchengladbach me rezultatin 3-1. Ekipi i Tedescos nuk përfitoi dot nga epërsia numerike në momentin kur ndeshja ishte 2-1, madje pësuan edhe një gol që mbylli llogaritë në këtë takim.
Ishte Embolo ai që prishi ekuilibrat që në minutën e 17-të duke i dhënë avantazhin Borussias. Megjithatë, Leipzig arriti të reagonte dhe i përhershmi Nkunku i çoi shifrat në 1-1. Kur dukej se pjesa e parë do të përfundonte në barazim, ishte Hofmann ai që kaloi sërish në avantazh Gladbachun.
Në pjesën e dytë, Leipzig kërkoi përmbysjen dhe gjithçka u duk më e lehtë kur Elvedi u ndëshkua me karton të kuq. Mirëpo kur të gjithë po prisnin të paktën golin e barazimit, ishte sërish Hofmann që shënoi për Borussian duke vulosur rezultatin e takimit në 3-1.
Kështu me dy javë nga fundi i kampionatit, Leipzig ndodhet në vendin e pestë, 1 pikë më pak se Freiburgu i vendit të katërt që në renditjen aktuale kualifikohet për Champions League.
Bayer Leverkusen sakaq duket se e ka hipotekuar zonën Champions edhe pse jo matematikisht. Ata mposhtën në shtëpi me rezultatin 2-0 Eintrach Frankfurt dhe ngjiten në kuotën e 58 pikëve, ku i mjafton vetëm një fitore për të siguruar matematikisht kompeticionin më elitar europian.
Paulinho i dha avantazhin Leverkusenit për pak më shumë se çerekore lojë duke e futur sfidën në rrugën e duhur për ekipin e tij. Megjithatë, goli i sigurisë erdhi nga Patrik Schick që shënoi në pjesën e dytë duke i çuar shifrat në 2-0. /oversport.tv
Foto: Borussia, Twitter
