Kryeministri i Kosovës Albin Kurti, i ka dërguar një propozim me shkrim ushtruesit të detyrës së kryetarit të Organizatës së Veteranëve të Ushtrisë Çlirimtare të Kosovës Faton Klinaku.
Këtë e ka konfirmuar për Klankosova.tv Përparim Kryeziu, zëdhënës i Qeverisë së Kosovës.
Kryeziu tha se Kurti propozon që menjëherë dhe bashkërisht të fillojë hartimi i një ligji të ri, i cili e nis një proces të vlerësimit dhe verifikimit të të gjithë pjesëmarrësve të luftës çlirimtare.
Ai theksoi se derisa të përfundojë ky proces propozohet përkrahje në punësimin e veteranëve përmes masave aktive të tregut të punës, duke subvencionuar një pjesë të pagës për një periudhë të caktuar.
“Në këtë letër, Kryeministri Kurti propozon që menjëherë dhe bashkërisht të fillojë hartimi i një ligji të ri, i cili e nis një proces të vlerësimit dhe verifikimit të të gjithë pjesëmarrësve të luftës çlirimtare. Hartimi i ligjit dhe procesi i verifikimit të kryhet në një kohë sa më të shpejtë. Ndërkohë, derisa të përfundojë ky proces, si mbështetje shtesë, kryeministri Kurti propozon përkrahje në punësimin e veteranëve përmes masave aktive të tregut të punës, duke subvencionuar një pjesë të pagës për një periudhë të caktuar”- tha Kryeziu.
Zëdhënësi i Qeverisë së Kosovës shtoi se me këtë rast do të sigurohen që të ketë një listë përfundimtare të veteranëve, duke mundësuar një trajtim të dinjitetshëm atyre që dhanë kontributin e tyre në çlirimin e vendit, njofton Klankosova.tv përcjell Klankosova.
“Ne besojmë se me këtë propozim sigurohemi që të kemi një listë përfundimtare dhe të saktë të veteranëve, duke i bërë nder luftës dhe sakrificës së popullit tonë dhe duke mundësuar një trajtim të dinjitetshëm atyre që dhanë kontributin e tyre në çlirimin e vendit” – shtoi ai.
“Alternativë ndaj këtij propozimi të Kryeministrit Kurti mbetet zbatimi i ligjit në fuqi për kategorizimin e veteranëve, i cili në momentin e miratimit, nga çfarë kemi kuptuar në takimin e qershorit, ka pasur edhe mbështetjen e OLV të UÇK-së. Të dy alternativat do të zhvilloheshin veçmas dhe pa e penguar apo ndikuar procesin gjyqësor në zhvillim e sipër”.
Kurti iu propozon veteranëve ligj të ri për verifikimin e pjesëmarrësve në luftë
