Naser Sahiti është shkarkuar nga pozita e rektorit të UP-së, nga ana e Këshillit Drejtues.
Vendimi është marrë gjatë mbledhjes së sotme.
RTV Dukagjini ka kuptuar nga burime brenda Këshillit se Luljeta Plakolli Kasumi-prodekane për marrëdhënie ndërkombëtare dhe projekte të studentëve, do të vendoset në pozitën e ushtrueses së detyrës së Rektorit, deri në zgjedhjen e kandidatit për këtë pozitë.
E kontaktuar nga Dukagjini lidhur me këtë temë, Plakolli-Kosumi, tha të mos ketë informata për një gjë të tillë, e as nëse emri i saj do të propozohet si pasuese e përkohshme e rektorit Sahiti.
E pyetur nëse është e gatshme ta pranojë një përgjegjësi të tillë, ajo ka thënë se do t’i duhet kohë ta mendojë.
“Nuk e di, duhet të mendohem sepse ishte pak befasi, duhet të mendohem por nëse është diçka që i ndihmon procesit, atëherë ndoshta edhe e shqyrtoj por nuk e di njëherë. Duhet edhe njëherë me pa a është propozu përnime emri im”, ka thënë ajo.
Plakolli-Kasumi, është familjare e presidentes Vjosa Osmani, por ka thënë se me presidenten janë kushërira të largëta.
“Nëse mu ka propozuar emri, ajo është me siguri për shkak të meritave të mia, punës time jo pse jam familjare e dikujt”, ka përfunduar ajo.
“Familjare nuk jemi, jemi kushërira shumë të largëta që nuk mund ta zhbëjë historinë familjare dhe absolutisht kjo nuk ka ndonjë relevancë se a jam unë familjare apo jo, qoftë e afërt apo e largët e presidentes. Kështu që kjo pyetje, mos u kapni në këtë kahje. Presidentja e ka profesionin e vet, jetën e vet, zhvillimin e karrierës së vet, unë e kam timen dhe absolut nuk na lidh kurgjo tjetër përveç një lidhje gjaku e largët”.
Rektori i Universiteti të Prishtinës, Naser Sahiti, është shkarkuar nga pozita e tij.
Kjo është bërë, në mbledhjen e Këshillit Drejtues të UP-së, në të cilën ishin të përjashtuara mediat.
