UEFA ka konfirmuar vazot për fazën e grupeve të Ligës së Kombeve për edicionin 2024/25.
Shorti do të hidhet më 8 shkurt në Paris. 54 ekipe janë të ndara në katër liga; A, B, C dhe D.
Kosova është pjesë e Ligës C, nivelit të tretë në Ligën e Kombeve, teksa do të jetë në vazon e dytë për shortin e ardhshëm.
Në Ligën C janë 16 ekipe të ndara në katër vazo. Në vazon e parë janë ekipet e renditura nga pozita e 33-të deri te e 36-ta. Në vazon e dytë janë ato nga pozita e 37-të deri në të 40-tën. Vazo e tretë përbehet nga pozitat 41 deri në 45 dhe vazo e katërt nga pozitat 45 te 48.
Pozita e 46-të do të mësohet pas ndeshjes së “play-out” mes Lituanisë dhe Gjibraltarit, që do të zhvillohet në mars të vitit 2024. Skuadra fituese do të mbetet në Ligën C.
Kombëtarja e Shqipërisë është pjesë e Ligës B, nivelit të dytë në Ligën e Kombeve, teksa do të jetë në vazon e tretë për shortin e ardhshëm.
Në Ligën B janë 16 ekipe të ndara në katër vazo me nga katër ekipe, sipas renditjes nga pozita e 17-të deri në pozitën e 32-të.
Kujtojmë se ndeshjet e para të edicionit 2024/25 të Ligës së Kombeve do të zhvillohen në shtator të vitit të ardhshëm. Ndeshjet tjera pastaj do të zhvillohen në tetor dhe nëntor.
Faza e “Play-Off” është e paraparë për t’u zhvilluar në mars të vitit 2025, kurse “Final Four” në qershor të atij viti.
Liga e Kombeve do të jetë përcaktuese për katër kombëtaret e fundit evropiane që do të kualifikohen në Kupën e Botës 2026.
