Edhe rajoni jonë nuk është imun ndaj ndikimit të Rusisë. Këto veprime të Serbisë janë të papranueshme, që kanë për qëllim destabilizimin dhe ndarjen e Kosovës. Kështu ka deklaruar kryetari i parlamentit të Kosovës, Glauk Konjufca gjatë takimit me kryetarin e Kuvendit të RMV-së, Talat Xhaferi.
“Ne si popull qëndrojmë të bashkuar për t’i dënuar këto veprime. Kosova është e përcaktuar për dialog, që çdo çështje të zgjidhet me dialog, por e refuzojmë gjuhën e dhunës, eskalimit dhe të barrikadave që po vendosen me dijeninë e presidentit të Serbisë, Brenda territorit të Kosovës”, tha Konjufca, raporton SHENJA.
Ai tha se Kosova këtë muaj i ka ndërmarrë dy veprime që ishin në koordinim me SHBA-në dhe BE-në. E para arritja e marrëveshjes në Bruksel për çështjen e targave, dhe e dyta, edhe me sugjerimin e miqve tonë ndërkombëtar, ishte shtyrja e zgjedhjeve në Veri.
“Serbia në anën tjetër u përgjigj përmes mbështetjes së eksponentëve që janë në krye të krimit të organizuar në atë pjesë të Kosovës, të cilët ndërmarrin veprim kundër policisë së Kosovës, të cilët i mbyllin edhe rrugët ndërkombëtare, përmes barrikadave. Këta eksponentë janë në listën e zezë të SHBA-së tash edhe të Britanisë së Madhe, dhe urojmë që një ditë të jenë në listën e zezë të BE-së. Ne nuk do të lejojmë që brenda territorit të Kosovës, Vuçiqi të komandoj nëpërmjet këtyre bandave”, u shpreh Konjufca,
Konjhufca tha se qëllimi i Serbisë është eskalimi i situatës, ndërsa Kosova ka për qëllim të deeskalohet dhe për këtë kemi bërë dy veprimet.
“Është radha e Serbisë të distancohet prej këtyre grupeve që bëjnë veprime kriminale”, tha Konjufca. /SHENJA/