LOS ANXHELES, 9 dhjetor /ATSH-AFP/ – Aktori amerikan Ryan O’Neal, i njohur për rolet e tij në filmat e Stanley Kubrick “Love Story” dhe “Barry Lyndon”, vdiq të premten në moshën 82-vjeçare, njoftoi djali i tij.
“Kjo është gjëja më e vështirë që më është dashur të them ndonjëherë, por është ajo që është. Babai im ndërroi jetë i qetë sot”, shpjegoi Patrick O’Neal në Instagram.
Ryan O’Neal bëri emër në vitin 1970 me “Love Story”, një romancë ku ai luajti një student të drejtësisë në Harvard, i cili pasionohet pas një vajze të re, që detyrohet të punojë në bibliotekë për të paguar studimet.
Roli i dha atij një nominim për Oscar.
Më pas, ai u punësua veçanërisht nga Stanley Kubrick për “Barry Lyndon” të tij në 1975, një satirë sociale që eksploronte zakonet e shekullit XVIII.
Aktori ishte i njohur edhe për lidhjen e tij të trazuar me aktoren Farrah Fawcett (“Zonja qesharake”), e cila zgjati disa dekada.
Ajo vdiq nga kanceri në vitin 2009, në të njëjtën ditë me Michael Jackson.
Pas vdekjes së aktores, ai ishte në qendër të një mosmarrëveshjeje në lidhje me një portret të Farrah Fawcett të nënshkruar nga Andy Warhol, të pretenduar nga Universiteti i Teksasit.
Pas një beteje ligjore, një gjykatë në Kaliforni pranoi në 2013 se ai ishte pronari.
Aktori kishte pasur më parë përplasje të tjera me ligjin.
Në vitin 2009, ai u dënua me një program 18-mujor të trajtimit të drogës pasi policia e arrestoi atë dhe djalin e tij Redmond dhe gjeti metamfetaminën në shtëpinë e tyre në Malibu./ a.jor.
