TEL AVIV, 7 tetor /ATSH-DPA/ – Në vazhdën e sulmit të befasishëm ndaj Izraelit nga militantët e Hamasit në Rripin e Gazës, lideri i opozitës izraelite, Yair Lapid i ka kërkuar kryeministrit Benjamin Netanyahu të formojë një qeveri emergjente.
“Unë nuk shqetësohem për faktin se kush është fajtori dhe pse u befasuam”, tha Lapid, një ish-kryeministër centrist, në platformën X.
“Ne do të përballemi me armikun tonë në unitet”, shtoi ai.
“Shteti i Izraelit është në luftë. Nuk do të jetë një luftë e lehtë apo e shkurtër”, theksoi Lapid.
Ai i ofroi Netanyahut të formonte një koalicion të përbashkët profesional “që mund të përballojë luftën e vështirë, komplekse dhe të gjatë që na pret”.
Netanyahu e di se ai “nuk mund të bëjë luftë me përbërjen jofunksionale dhe ekstremiste të qeverisë”, pohoi Lapid, duke shtuar se ”Izraeli ka nevojë për udhëheqje të përgjegjshme”./ a.jor.