TEL AVIV, 30 janar /ATSH-DPA/- Presidenti izraelit Isaac Herzog ka nisur sot vizitën e parë presidenciale në shtetin e Gjirit, në Emiratet e Bashkuara Arabe (EBA).
Herzog shoqërohet në udhëtimin e tij dyditor nga bashkëshortja e tij Michal. Ai do të takojë, ndër të tjera, Princin e Kurorës së Abu Dhabit dhe kreun e shtetit de facto të Emirateve të Bashkuara Arabe, Sheikh Mohammed bin Sajid Al Nahjan.
Gjatë vizitës së tij, Herzog gjithashtu do të takohet me përfaqësues të komunitetit hebre në Ditën Kombëtare të Izraelit në Expo 2020 në Dubai.
Në dhjetor, kryeministri izraelit Naftali Bennett u bë kryeministri i parë i Izraelit që vizitoi zyrtarisht Emiratet e Bashkuara Arabe.
Izraeli nënshkroi marrëveshje me Emiratet e Bashkuara Arabe dhe Bahreinin në vitin 2020 për të vendosur marrëdhënie diplomatike. Deri atëherë, vetëm dy shtete arabe, fqinjët me Egjiptin dhe Jordaninë, kishin ruajtur marrëdhënie diplomatike me Izraelin.
Vitin e kaluar, Emiratet hapën një ambasadë në qytetin bregdetar izraelit të Tel Avivit. Vendet kanë vendosur linja ajrore direkte.
Faktori ekonomik shihet si shtytësi kryesor i afrimit, por vendet po krijojnë gjithashtu një aleancë kundër Iranit. //a.i/
