Detaje të reja kanë dalë në dritë nga përplasja e një avioni me 379 persona në bord me një aeroplan të dytë gjatë uljes në Tokio.
Ekspertët thonë se një evakuim i përsosur dhe teknologjia e re luajtën një rol të madh në shpëtimin e të gjithë bordit të avionit.
Por ata në avionin e rojës bregdetare të cilët do t’u ofronin ndihmë viktimave të tërmetit, nuk ishin aq me fat. Pesë humbën jetën, kurse piloti u plagos rëndë.
Hetuesit po përmbledhin se çfarë ndodhi në orën 17:47 me orën lokale (08:47 GMT) në aeroportin Haneda dhe pse dy avionë ishin në pistë në të njëjtën kohë.
Për momentin, videot dhe deklaratat e pasagjerëve tregojnë një pamje të terrorit disa minutash.
Suedezi Anton Deibe, 17 vjeç përshkroi kaosin pas përplasjes kur Airbus A350 u ndal në pistë.
“E gjithë kabina u mbush me tym brenda pak minutash”, tha ai për gazetën suedeze Aftonbladet.
“Tymi në kabinë thumbonte si ferr, ishte ferr. U hodhëm përtokë, pastaj u hapën dyert e emergjencës dhe u hodhëm në to. Ne nuk e kishim idenë se ku po shkonim, kështu që dolëm me vrap në fushë. Ishte kaos”, tha ai. Ai, prindërit dhe motra e tij arritën t’i shpëtonin zjarrit.
Satoshi Yamake, një pasagjer 59-vjeçar, tha se avioni ishte “anuar në një anë dhe ndjeu një përplasje të madhe”.
Një tjetër pasagjer i paidentifikuar përshkroi një “gungë, sikur avioni po përplasej me diçka kur zbriste. Pashë një shkëndijë jashtë dritares dhe kabina ishte e mbushur me tym”.
Një i tretë raportoi për Kyodo News se ai ndjeu “një bum sikur kishim goditur diçka dhe u hodhëm lart në momentin që zbritëm”.
Disa pasagjerë filmuan zjarrin në një prej motorëve, ndërsa avioni u ndal. Një pasagjere tha se në bord kishte qenë errësirë pasi zjarri u shtua pas uljes.
“Po bëhej nxehtë brenda aeroplanit dhe mendova, të jem e sinqertë, nuk do të mbijetoja”, tha ajo për transmetuesin japonez NHK.
“Një njoftim thoshte se dyert në pjesën e pasme dhe të mesme nuk mund të hapeshin. Kështu të gjithë zbarkuan nga përpara”, tha një tjetër pasagjer.
Zjarri u “izolua në një zonë” të Airbus A350 për 90 sekondat e para, duke i lejuar atyre një dritare të shkurtër për t’i nxjerrë të gjithë jashtë.
Alex Macheras, një analist i aviacionit, tha për BBC se ekuipazhi mundi të niste evakuimin që në minutat e para vendimtare pas përplasjes.
Ai tha se ekuipazhi mundi të kuptonte qartë se cilat dyer ishin larg flakëve, kjo është arsyeja pse fotografitë tregojnë se jo të gjitha daljet ishin të hapura që njerëzit të shpëtonin.
Ai shtoi se pasagjerët mund të ngadalësojnë në panik, për shembull duke u përpjekur të kapin çantat e tyre nga dollapët.
Airbus A350 është një nga avionët e parë komercialë që është bërë nga materiale të përbëra me fibra karboni, të cilat duket se i kanë qëndruar mirë përplasjes fillestare dhe zjarrit.
E gjithë kjo u arrit pasi zjarri po përhapej me shpejtësi për të përfshirë avionin. Pasagjeri tha se mes kaosit u deshën rreth pesë minuta që të gjithë të dilnin jashtë.
“Pashë që zjarri ishte përhapur për rreth 10, 15 minuta”, shtoi ai.
Tsubasa Sawada, 28 vjeç, tha “mund të thoshte vetëm se ishte një mrekulli, ne mund të kishim vdekur”.
U deshën disa orë që zjarri të shuhej përfundimisht. Katërmbëdhjetë pasagjerë dhe ekuipazhi morën mjekime për lëndime të lehta.
Top Channel
