James Heappey, ministri britanik i Shtetit Përgjegjës për Mbrojtjen, tha se Perëndimi ka “të gjitha opsionet në tryezë” se si do të përgjigjet ndaj përdorimit të armëve kimike nga Rusia në Ukrainë.
Heappey u tha mediave të vendit pas përdorimit të dyshuar të armëve kimike të Rusisë në Mariupol të Ukrainës, se qeveria britanike nuk kishte konfirmuar ende raportet për përdorimin e armëve kimike.
“Megjithatë, nëse përdorimi i armëve kimike rezulton të jetë i saktë, Presidenti rus Vladimir Putin duhet të dijë se “të gjitha opsionet” janë në tryezë se si do të përgjigjet Perëndimi”, tha Ministri Heappey.
I pyetur nëse kjo nënkupton pjesëmarrjen e drejtpërdrejtë të NATO-s, Heappey tha se “Të gjitha opsionet janë në tryezë.”
Putin duhet të jetë i vetëdijshëm se përdorimi i armëve kimike është “i papranueshëm”, tha Heappey.
“Ai nuk duhet të presë që Perëndimi të qëndrojë i heshtur ndaj përdorimit të këtyre armëve”, tha ai.
Duke theksuar se ka disa gjëra që kalojnë kufijtë dhe se është e rëndësishme të jemi shumë të qartë se përdorimi i armëve kimike do të marrë një përgjigje, Heappey nënvizoi se opsionet për atë që mund të jetë kjo përgjigje janë në tryezë.
“Nëse armët kimike janë përdorur, ky është një moment shumë i rëndësishëm për Kryeministrin tonë (Boris Johnson) dhe krerët e tjerë të qeverive në mbarë botën që të mendojnë se si t’i përgjigjen kësaj,” tha ai.
Ministrja e Jashtme britanike Liz Truss gjithashtu postoi dje në Twitter se vendi i saj po punon me partnerët për të verifikuar detajet e raporteve se forcat ruse mund të kenë përdorur armë kimike në një sulm në Mariupol.
Zëdhënësi i Departamentit të Mbrojtjes së Shteteve të Bashkuara (Pentagon), John Kirby tha se përdorimi i dyshuar i armëve kimike nga Rusia në Mariupol të Ukrainës është alarmant.
“Kjo konfirmon shqetësimet tona për potencialin e Rusisë për të përdorur materiale të ndryshme kimike të përziera në gaz lotsjellës që përdoret për kontrollin e turmave në Ukrainë”, tha Kirby.
