GAZA, 15 dhjetor /ATSH-DPA/ – Ushtria izraelite deklaroi se kishte kapur dhe shkatërruar një qendër komandimi dhe kontrolli të përdorur nga një batalion i Hamasit në qytetin e Gazës.
Ushtarët vranë disa militantë gjatë operacionit në distriktin Shejaiya, i konsideruar si një nga bastionet e fundit të Hamasit në Rripin e Gazës.
Pak ditë më parë, ministri izraelit i Mbrojtjes Yoav Gallant njoftoi se qendra komanduese e Hamasit në Shejaiya ishte e rrethuar.
Izraeli vlerëson se Hamasi, lëvizja ekstremiste palestineze që kontrollon Gazën, ka gjithsej 24 batalione, secili me rreth 1 000 anëtarë.
Hamasi është përgjegjës për masakrat e 7 tetorit në jug të Izraelit që shënuan fillimin e luftës në Gaza. Mbi 1 200 njerëz vdiqën në komunitetet izraelite, kryesisht civilë.
Ushtria izraelite gjithashtu njoftoi se kishte vrarë më shumë militantë në Khan Younis, në Rripin jugor të Gazës.
Në një tunel të zbuluar në Khan Younis, ushtarët thuhet se gjetën motoçikletat e përdorura në masakrat e 7 tetorit. /os/
