PARIS, 12 dhjetor /ATSH-DPA/ – Qeveria franceze ka humbur për momentin në përpjekjen e saj për të kaluar reformat e migracionit përmes Asamblesë Kombëtare.
Qeveria e qendrës së djathtë ka thënë se legjislacioni i propozuar do të funksionojë për të kontrolluar migracionin dhe për të përmirësuar integrimin.
Ligji do të kishte dhënë leje qëndrimi të përkohshme për migrantët që punojnë në profesione ku ka mungesë të fuqisë punëtore.
Në të njëjtën kohë, do t’i jepte qeverisë fuqinë për të detyruar disa migrantë të mbrojtur më parë të largoheshin nga vendi si edhe do të zgjaste deportimet.
Të hënën, shumica e Parlamentit votoi në favor të një mocioni për të rrëzuar projektligjin përpara debatit plenar.
Konservatorët, nacionalistët e krahut të djathtë dhe forcat e krahut të majtë mbështetën mocionin e të Gjelbërve, duke marrë një shumicë të ngushtë prej 270 votash ndaj 265 votave.
Megjithatë, kjo nuk do të thotë se plani i diskutueshëm i qeverisë së presidentit Emmanuel Macron është jashtë tryezës.
Ndërkohë, qeveria mund ta tërheqë projektligjin, pasi mund ta paraqesë atë edhe në Senat, Dhoma e Lartë e parlamentit francez.
Qeveria mund të mbledhë gjithashtu një komision senatorë dhe deputetësh për të diskutuar projektin.
Pas votimit, ministri i Brendshëm Gerald Darmanin i ofroi dorëheqjen presidentit Macron.
”Kjo është normale”, tha Darmanin në TF1./ /os/
