PARIS, 22 janar /ATSH-DPA/ – Fermerët protestues kanë zgjeruar bllokadat e tyre në shumë pjesë të Francës përpara një takimi sot midis organizatave bujqësore dhe kryeministrit të ri francez, Gabriel Attal.
“Disa autostrada në jug të Francës u bllokuan pranë Toulouse”, njoftoi transmetuesi francez “France Info”.
Fermerët e kaluan natën në zonat e bllokadës në autostradën A64, ku një mur prej kashte u përfshi nga flakët.
“Rruga e hyrjes në centralin bërthamor në Golfech në Francën jugore u bllokua gjithashtu nga fermerët”, raportoi gazeta “La Dépêche du Midi”.
Në kufirin spanjoll pranë Perpignan, fermerët zaptuan një kabinë me pagesë në një autostradë.
Protesta u zhvilluan edhe në Alsace në kufirin gjermano-francez pranë Lauterbourg.
“Fermerët francezë iu bashkuan fermerëve gjermanë duke bllokuar urën në një rrugë fshati që lidh Gjermaninë me autostradën A35 në bregun e majtë të Rhein drejt Strasburgut”, raportoi gazeta rajonale “Les Dernières Nouvelles d’Alsace”.
Fermerët po përballen me probleme të shumta, duke përfshirë furnizimin me ujë të mjaftueshëm për fermat e tyre në rajone ku thatësira e vazhdueshme po bëhet gjithnjë e më shumë një barrë.
Fermerët francezë, ashtu si homologët e tyre gjermanë, po përballen gjithashtu me çmimin e naftës bujqësore, kostot e energjisë dhe problemet e të ardhurave në përgjithësi, si dhe rregulloret e tepërta.
Organizatat bujqësore kanë njoftuar se do të vazhdojnë protestat e tyre edhe këtë javë.//a.i/