PEKIN, 9 janar /ATSH-AFP/ – Kreu i diplomacisë kineze Wang Yi vlerësoi sot se marrëdhëniet midis vendit të tij dhe SHBA ishin stabilizuar vitin e kaluar, në një kohë kur dy fuqitë kryesore ekonomike po forcojnë dialogun për të kapërcyer dallimet.
Marrëdhëniet midis Pekinit dhe Uashingtonit janë përkeqësuar dukshëm vitet e fundit dhe mosmarrëveshjet e tyre janë grumbulluar, nga tregtia në Tajvan, përmes rivalitetit në teknologjitë e reja dhe luftën për ndikim në rajonin e Azisë-Paqësorit.
Por, të dy vendet duket se janë të prirura për të rinovuar dialogun, me Uashingtonin që ka dërguar disa zyrtarë të lartë në Pekin vitin e kaluar dhe një takim në nëntor midis presidentit amerikan Joe Biden dhe homologut të tij kinez Xi Jinping në San Francisko, në kuadër të një samiti të APEC-ut.
“Me përpjekje të ashpra, të dy palët rifilluan dialogun dhe komunikimin, marrëdhëniet bilaterale ndaluan përkeqësimin dhe stabilizimin”, tha Wang Yi.
Ministri i Punëve të Jashtme kineze, i cili ndërmori aksionet diplomatike të Kinës, pranoi se marrëdhëniet me SHBA kishin hasur “vështirësi serioze” në fillim të vitit 2023.
”Pekini shprehu qartë qëndrimin e tij dhe kërkoi që SHBA të ndryshonIN kuptimin e tyre për Kinën dhe të ktheheshin në një politikë racionale dhe pragmatike”, tha Wang Yi për shtypin.
Marrëdhëniet midis dy vendeve mbeten të tensionuara rreth çështjes së Tajvanit, të cilat qeveria kineze e konsideron si një pjesë integrale të Kinës.
Territori, i mbështetur ushtarakisht nga SHBA dhe ku rreth 23 milionë banorë qeverisen sipas një sistemi demokratik, do të mbajë zgjedhjet presidenciale të shtunën.
Nënkryetari William Lai, nga Partia Demokratike Progresive (PDP) pro pavarësisë, është favorizuar për të pasuar presidenten aktuale Tsai Ing-wen (gjithashtu PDP).
Kina e konsideron Tajvanin si një nga provincat e saj, të cilën ende nuk ka arritur ta ribashkojë me pjesën tjetër të territorit të saj që nga përfundimi i luftës civile kineze në 1949.
Pekini thotë se favorizon ribashkimin “paqësor” me territorin, por nuk përjashton opsionin ushtarak për ta arritur këtë, veçanërisht në rast të një deklarate formale të pavarësisë për ishullin.
Wang Yi tha se presidenti Joe Biden i kishte premtuar homologut të tij kinez, Xi Jinping, gjatë takimit të tyre, se SHBA nuk e “mbështesnin” pavarësinë e Tajvanit./ a.jor.
