KIEV, 26 shkurt /ATSH-AA/ – Zëdhënësi i presidentit ukrainas Volodymyr Zelenskyy tha se Ukraina dhe Rusia po vazhdojnë konsultimet në lidhje me vendin dhe kohën e negociatave.
Zëdhënës Sergiy Nikiforov përmes një postimi në Facebook tha se vendi i tij është gjithmonë i gatshëm për një armëpushim, paqe dhe negociata dhe mohoi një deklaratë të mëparshme të Kremlinit se Ukraina refuzoi ofertën e Rusisë për të negociuar.
Ukraina “pranoi” ofertën e presidentit rus Vladimir Putin, tha Nikiforov, i cili shtoi se të dy palët vazhdojnë të konsultohen për vendin dhe kohën e procesit të negociatave.
Më herët gjatë ditës, Ministria e Jashtme ruse tha se Ukraina refuzoi ofertën e saj për të negociuar.
Zëdhënësja Maria Zakharova tha në një konferencë për media në Moskë se Ukraina refuzoi të fillonte negociatat në Minsk, por Kievi ofroi të diskutonte këtë çështje.
Më herët, zëdhënësi i Kremlinit Dmitry Peskov tha se Rusia është e gatshme të dërgojë një delegacion në Minsk për bisedime.
Ndërhyrja ushtarake e Rusisë në Ukrainë hyri në ditën e dytë, me raportet e fundit që tregojnë se trupat ruse po shkonin drejt kryeqytetit Kiev nga disa drejtime.
Putin kishte urdhëruar ndërhyrjen ushtarake të enjten, vetëm disa ditë pasi njohu dy enklavat e kontrolluara nga separatistët në Ukrainën lindore.
Ai pretendoi se Moska nuk kishte plan për të pushtuar vendin fqinj, por donte të “çmilitarizonte” dhe “denazifikonte” Ukrainën.
Presidenti ukrainas Volodymyr Zelenskyy akuzoi Rusinë se po përpiqet të instalojë një qeveri-kukull dhe tha se ukrainasit do të mbrojnë vendin e tyre kundër agresionit rus.
Tensionet filluan të përshkallëzohen në fund të vitit të kaluar kur Ukraina, SHBA dhe aleatët e saj akuzuan Rusinë për grumbullimin e rreth 150.000 trupave në kufirin me Ukrainën.
