UASHINGTON, 30 mars /ATSH-DPA/ – Sipas një raporti të medias, përfaqësuesit e Izraelit dhe të SHBA-së kanë planifikuar të takohen të hënën në Uashington për bisedime lidhur me ofensivën tokësore të planifikuar të Izraelit në Rafah në Rripin e Gazës.
Delegacioni izraelit pritet të mbërrijë këtë javë për të dëgjuar shqetësimet e SHBA-së dhe për të paraqitur alternativat.
Megjithatë, kryeministri izraelit Benjamin Netanyahu e anuloi udhëtimin pasi Këshilli i Sigurimit i OKB-së miratoi një rezolutë që bënte thirrje për një armëpushim të menjëhershëm pa kundërshtim nga SHBA-ja.
“Izraelitët kishin propozuar shtyrjen e bisedimeve deri të hënën”, raportoi transmetuesi amerikan CNN.
Megjithatë, planifikimi është i komplikuar nga fakti se qeveria e Izraelit ka afat deri të dielën për të hartuar një ligj të ri mbi çështjen e shërbimit të detyrueshëm ushtarak për burrat hebrenj ultra-ortodoksë. Ata prej kohësh janë përjashtuar nga shërbimi i detyrueshëm ushtarak.
Për shkak të luftës në Rripin e Gazës, qeveria e Izraelit është nën presion për t’i dhënë fund përjashtimit të komunitetit ultra-ortodoks nga shërbimi ushtarak. Ligji që autorizonte përjashtimin e tyre humbi fuqinë vitin e kaluar.
Që atëherë, një rregullore e përkohshme ka qenë në fuqi – por vetëm deri të dielën. Qeveria e Izraelit, e cila përfshin gjithashtu parti rreptësisht fetare, po punon për një ligj të ri për një përjashtim të besimtarëve ultra-ortodoksë.
Netanyahu kishte aplikuar në Gjykatën e Lartë për të zgjatur afatin për hartimin e projektligjit.
Pas një urdhri të përkohshëm nga gjykata këtë javë për të anuluar subvencionet shtetërore për burrat ultra-ortodoksë në moshë rekrutimi nga 1 prilli, një vendim pritet të merret nesër nëse këta burra do t’i nënshtrohen gjithashtu shërbimit të detyrueshëm ushtarak në të ardhmen.
Kjo do të varet nëse gjykata do të aprovojë kërkesën e Netanyahut për një shtyrje të mëtejshme 30-ditore.
Prandaj është ende e paqartë nëse delegacioni izraelit do të lejohet të udhëtojë në SHBA ndërsa kjo çështje e brendshme politike është ende në zhvillim, raportoi CNN. Sipas zyrtarëve amerikanë, një datë e saktë për vizitën në Uashington nuk është caktuar ende.//a.i/