MOSKË, 5 mars /ATSH-DPA/- Rusia po shqyrton planin e ndërtimit të një centrali bërthamor në Hënë, së bashku me Kinën, tha sot kreu i agjencisë ruse të hapësirës “Roscosmos”, Yuri Borisov.
“Sot ne po shqyrtojmë seriozisht projektin e dorëzimit dhe ndërtimit të një centrali energjetik në sipërfaqen e Hënës, diku midis viteve 2033 dhe 2035 së bashku me kolegët tanë kinezë”, tha Borisov gjatë një aktiviteti për të rinjtë.
“Ndërtimi i centralit nuk do të bëhet me dorë por me makineri. Zgjidhjet teknike për këtë, tashmë ekzistojnë në praktikë”, tha ai.
Shefi i “Roscosmos” theksoi se Rusia nuk po kërkon të vendosë armë bërthamore në hapësirë.
“Rusia ka folur gjithmonë kundër kësaj dhe do të mbajë këtë qëndrim”, tha ai.
Kohët e fundit ka pasur spekulime në SHBA se Rusia kërkon të luftojë satelitët me një lloj të ri armësh bërthamore.
Presidenti rus Vladimir Putin e ka mohuar këtë, por kjo ide ka shfaqur shqetësime në SHBA.
Rusia dhe Kina nënshkruan një deklaratë qëllimi në vitin 2021 për të zgjeruar bashkëpunimin e tyre në hapësirë, në sfondin e rritjes së tensioneve midis Moskës dhe Perëndimit. //a.i/
