MEKSIKO, 27 prill /ATSH-DPA/- Meksika i ka kthyer të ashtuquajturat ‘terapi të konvertimit gjinor’ në një vepër penale pas shumë vitesh fushate nga aktivistët.
Senati miratoi dje një reformë ligjore që parashikon dy deri në gjashtë vjet burgim për kryerjen e praktikave që synojnë ndryshimin e orientimit seksual ose identitetit gjinor të një personi tjetër.
“Ata që financojnë ose zbatojnë trajtime të tilla gjithashtu do të penalizohen”, njoftoi Senati pas votimit.
Dënime më të mëdha parashikohen nëse të miturit preken nga trajtimet. Nëse prindërit janë të përfshirë, një gjyqtar do të vendosë për dënimet.
Termi “terapi konvertimi” i referohet praktikave të ndryshme për kurimin e supozuar të homoseksualitetit dhe transseksualitetit, ndër të tjera.
Sipas ekspertëve të OKB-së dhe aktivistëve të të drejtave të njeriut, këto praktika shpesh shkaktojnë dëme të rënda fizike dhe psikologjike te të prekurit.
Metodat e përdorura përfshijnë mjekimin e detyruar, rrahjen, izolimin dhe forma të tjera abuzimi, të cilat aktivistët i barazojnë me torturën.//a.i/
