MOSKË, 30 shtator /ATSH-AA/ – Presidenti rus Vladimir Putin në një ceremoni të mbajtur në Kremlin njoftoi bashkëngjitjen e katër rajoneve ukrainase me Rusinë.
Putin tha se u mbajtën referendumet e mbajtura gjatë pesë ditëve, nga 23 shtatori deri më 27 shtator, dhe populli i këtyre rajoneve zgjodhi këtë rrugë.
Putin gjithashtu tha se “operacioni special ushtarak” i Moskës në Ukrainë, i cili filloi në shkurt, ishte i nevojshëm për të penguar rreziqet ushtarake të paraqitura nga afrimi i Ukrainës me NATO-n.
Por Rusia mund të përfitojë edhe ekonomikisht nga inkorporimi i territoreve të reja: Donetsk, Kherson, Luhansk dhe Zaporizhzhia.
Rindërtimi i territoreve të shkatërruara nga lufta kërkon investime të mëdha, por besohet se përfitimet mund të jenë edhe më të mëdha.
Të katër rajonet përbëjnë më shumë se 90.000 kilometra katrorë, ose gati 15 për qind të sipërfaqes totale të Ukrainës.
Deri në vitin 2014, rajoni i Donetskut ishte qendra industriale e Ukrainës, duke përbërë 20 për qind të prodhimit industrial të vendit. Është rajon i pasur me burime minerale, duke pasur lokalitetin e katërt më të madh të qymyrit në Evropë.
Rajoni Luhansk është një qendër e rëndësishme transporti dhe është i njohur për industrinë e tij të metalurgjisë, makinerive dhe industrinë bujqësore. Ka ndërmarrje metalurgjike, uzina kimike, farmaceutike dhe disa miniera qymyri.
Rajoni Zaporizhzhia, ndërkohë, është qendra e furnizimit me energji dhe prodhon 25 për qind të energjisë elektrike të Ukrainës.
Tre prodhues të fuqishëm të energjisë ndodhen në rajonin juglindor: termocentrali bërthamor Zaporizhzhia, objekti më i madh bërthamor në Evropë, hidrocentrali Dnieper dhe ferma e erës në Botievo.
Zaporizhzhia ka gjithashtu disa objekte të mëdha inxhinierike industriale dhe mekanike.
Rajoni Kherson, me portin e tij, është i specializuar në ndërtimin e anijeve dhe është i njohur për vendpushimet, si dhe me bujqësinë e tij.
Përveç kësaj, i gjithë Deti Azov do të bëhet gjithashtu pjesë e Rusisë.
Rusia, e cila përballet me një rënie të popullsisë, mund të përmirësojë gjithashtu situatën e saj demografike, pasi rreth 9 milionë njerëz jetojnë në katër rajonet e Ukrainës.
Ministria e Jashtme e vendit tha të mërkurën se mbi 98 për qind e njerëzve që jetojnë në rajonet e Ukrainës mbështesin bashkimin me Rusinë.
Referendumet janë dënuar nga komuniteti ndërkombëtar, ndërsa kombet evropiane dhe SHBA-të i quajtën referendumet “të rreme” dhe se nuk do të njihen. /os/
