BRUKSEL, 13 dhjetor /ATSH-DPA/ – Shtetet anëtare të BE-së kanë rënë dakord për një direktivë kyçe për të zbatuar një taksë të re minimale globale të korporatave, një politikë e bllokuar prej kohësh nga Hungaria, ka njoftuar presidenca çeke e Këshillit të BE-së.
“Zbatimi efektiv i direktivës do të kufizojë garën deri në fund në normat e taksave të korporatave,” tha Këshilli Evropian në një deklaratë për shtyp pas një takimi të përfaqësuesve të përhershëm të vendeve anëtare të BE në Bruksel të hënën.
Në tetor 2021, 137 vende, përfshirë BE-në dhe SHBA-në, nënshkruan një marrëveshje të madhe të koordinuar nga Organizata për Bashkëpunim dhe Zhvillim Ekonomik (OECD) për një normë minimale globale të taksës së korporatave prej 15%.
Qëllimi i marrëveshjes është të parandalojë korporatat e mëdha nga zhvendosja e fitimeve në rajone me taksa më të ulëta dhe shumëkombëshe që të paguajnë më shumë taksa atje ku operojnë.
Sipas direktivës së rënë dakord nga vendet anëtare të BE-së, kompanitë e mëdha me të ardhura mbi 750 milionë euro (790 milionë dollarë) duhet të paguajnë normën minimale të tatimit pavarësisht nga baza e tyre e operimit.
Një pjesë e dytë e marrëveshjes globale kërkon që kompanitë e mëdha shumëkombëshe si Facebook të paguajnë më shumë taksa aty ku gjenerohen fitimet dhe jo aty ku janë të bazuara kompanitë. Megjithatë, kjo pjesë është ende subjekt i negociatave ndërkombëtare.
Sipas marrëveshjes së së hënës, vendet anëtare të BE-së tani duhet ta shndërrojnë direktivën e re në ligj kombëtar deri në fund të vitit 2023./ /os/
