ISLAMABAD, 28 mars /ATSH-DPA/ Transmetuesi ndërkombëtar gjerman Deutsche Welle (DW) ka konfirmuar se shërbimi i tij është ndaluar në Afganistan, duke iu bashkuar listës së medieve të huaja të ndaluara nga talebanët në pushtet, si BBC dhe Zëri i Amerikës.
Gjatë një deklarate lidhur me kufizimet që bllokojnë partnerët afganë të përdorin përmbajtjen e saj, drejtori i përgjithshëm i “DW” Peter Limbourg shprehu shqetësimet për shtypin e lirë në vendin e goditur nga kriza.
“Kufizimet në rritje për lirinë e shtypit dhe lirinë e shprehjes në Afganistan janë shumë shqetësuese”, tha Limbourg.
“Fakti që talebanët po kriminalizojnë shpërndarjen e programeve të “DW” nga partnerët tanë mediatikë po pengon zhvillimet pozitive në Afganistan. Media e lirë është thelbësore dhe ne do të bëjmë gjithçka që mundemi për t’i ofruar popullit të Afganistanit një informacion të pavarur nëpërmjet internetit dhe medias sociale”, shtoi ai. //a.i/