Talibanët do të shënojnë të hënën një vit që kur morën kontrollin e Afganistanit. Pas njëzet vjet lufte, ata premtuan se do të sillnin paqe në një vend të shkatërruar nga dekada konflikti dhe pushtimi amerikan.
Udhëheqësi i shquar i talebanëve Anas Haqqani përshkroi arritjet dhe dështimet e grupit që nga marrja e pushtetit më 15 gusht 2021, në një intervistë me Al Jazeera.
“Në vitin e kaluar kemi arritur zhvillime të shumta, kryesisht liri dhe pavarësi duke e çliruar vendin tonë nga pushtimi, padrejtësia dhe shtypja e huaj. Për këtë synon çdo komb apo vend i pushtuar. Është krenaria jonë, është edhe bekim.
Ju mund t’i shihnit vetë ndryshimet e mëdha që po kalon vendi ynë, kryesisht në aspektin e sigurisë. Është hera e parë në 40 vjet që qeveria qendrore ka vënë nën kontroll të gjithë vendin, në çdo hap. Ka shumë të tjera për të renditur, por është e rëndësishme të përmendet se nuk ka më taksa të detyrueshme që u vendoseshin më parë njerëzve. Grupet speciale militante (ose ato të quajtura Ishujt e Pushtetit) nuk veprojnë më në vend. Shteti është në gjendje t’u paguajë pagat nëpunësve civilë në të gjitha institucionet shtetërore pa asnjë taksë apo ndihmë të huaj. Këto janë vetëm disa shembuj”, thotë në fillim të bisedës Anas Haqqani.
“Keni premtuar shumë gjëra. Ju premtuat paqe, ju premtuat të drejta për të gjithë afganët, ju premtuat një qeveri gjithëpërfshirëse, ju premtuat të drejtat e grave. Sa prej atyre premtimeve i keni përmbushur?, pyeti gazetari Al Jazeera-s.
“Pushtimi i huaj që ka kontrolluar Afganistanin për 20 vitet e fundit, me teknologjitë e tij të avancuara, aftësitë dhe burimet e mëdha, ka dështuar gjatë kësaj periudhe të gjatë kohore. Ata nuk arritën të vendosin sigurinë dhe rendin që gëzojnë tani njerëzit tanë.
Ka vetëm një vit që ne kemi marrë pushtetin dhe bota nuk duhet të presë që ne t’i arrijmë të gjitha qëllimet tona brenda natës. Kjo është pothuajse e pamundur, aq më tepër që (bashkësia ndërkombëtare) nuk i ka përmbushur premtimet e veta, përfshirë njohjen e qeverisë sonë dhe ndihmën e huaj. Pavarësisht vonesës nga ana e tyre, ne, me hir të Zotit, kemi bërë përparim të madh në shumë fusha.
Tani mund të shihni vajza që regjistrohen në universitete dhe shkolla deri në klasën e 12-të. Sigurisht që ka ende shumë masa që duhen marrë në të gjitha ministritë tona dhe institucionet e tjera shtetërore. Mos prisni që ne të arrijmë atë që të tjerët nuk kanë arritur ta bëjnë në 20 vitet e fundit mes sfidave me të cilat përballemi”.
Duke iu përgjigjur pyetjes se çfarë po bëjnë talebanët për të zgjidhur krizën e theksuar humanitare, veçanërisht duke pasur parasysh se rreth tre milionë afganë janë të zhvendosur brenda vendit, Haqqani përgjigjet:
“Siç thashë më parë, Afganistani sot është krejtësisht i ndryshëm nga ai që ishte 20 vjet më parë. Për shembull, qeveria e mëparshme nuk bëri asgjë për Mazar-i-Sharif; ata ishin nën presionin e të tjerëve (pushtimi amerikan). Filluam të bëjmë diçka në drejtimin e duhur. Tani shihni minerale dhe burime natyrore që nxirren nga kompani vendase dhe të huaja. Me ndihmën e Zotit, përmes këtyre projekteve tani mund të gjenerojmë të ardhura për funksionimin e ministrive tona dhe institucioneve të tjera, të paguajmë paga.
Një tjetër burim i të ardhurave vjen nga taksat doganore. Të gjitha ato të ardhura kanë rënë në duar të gabuara në të kaluarën. Të gjitha të ardhurat e shtetit tani i drejtohen thesarit të shtetit, bankës qendrore dhe Ministrisë së Financave. Këta ishin shembujt më të spikatur të përparimit që kemi bërë.
Duke thënë këtë, ne përpiqemi për marrëdhënie të mira dhe miqësore me të gjitha vendet dhe të gjithë komunitetin ndërkombëtar. Gjithashtu, është detyra jonë të sigurojmë një mënyrë jetese dinjitoze dhe komode për popullin tonë. Ne jemi këtu për t’i shërbyer popullit tonë. Besoj se kemi arritur shumë për popullin tonë. Por ne përpiqemi për më shumë, pavarësisht sfidave me të cilat përballemi për shkak të mosnjohjes së qeverisë sonë nga komuniteti ndërkombëtar”.
Haqqani iu referua edhe përmbushjes së premtimit se Afganistani nuk do të jetë vend ku do të strehohen grupet terroriste dhe nga ku do të kryejnë sulme.
“Që nga nënshkrimi i Marrëveshjes së Dohas, ne i kemi respektuar të gjitha obligimet. Ne jemi muslimanë të vërtetë, para së gjithash jemi të detyruar ta mbajmë fjalën e dhënë”, përfundoi Haqqani. /tesheshi.com/
