Një postim institucional nga Komuna e Prishtinës, me një gjuhë të ulët si në formë e përmbajtje, e cila nuk ka asnjë lidhje me seriozitetin shtetëror, ka shkaktuar një furtunë reagimesh në rrjete sociale.
Më saktë, Drejtoria e Shërbimeve Publike, është ankuar për mbetjet e një iftari në sheshin “Adem Jashari”, duke mos patur asnjë sens vetëpërmbajtjeje në tre apo katër fjali të ndërtuara si mos më keq, si gjuhësisht e si përmbajtësisht, duke fyer një komunitet të tërë, siç ai musliman, në këtë muaj Ramazani.
“Ua japim lejen per ta organizu IFTARIN ne sheshin Adem Jashari dhe ja ne cfar gjendje i lane hapsirat publike, per tu bere mepastaj pastrimi i ketyre hapsirave barre e njesiteve tona per pastrim emergjent.
Neser pason gjoba dhe futja ne listen e zeze te organizatorit”, shkruhet prej saj, ku pasojnë reagimet e shumta:
Ndërkohë, një prej reagimeve më të kopsitura, ishte ky i një komentuesi:
“Kurrë, ama kurrë nuk është e lejuar me e ndotë qytetin. Islami nuk lejon diçka të tillë. Muslimanët nuk bëjnë diçka të tillë. Nëse bëjnë, ata nuk kanë marrë edukatë nga kjo fe dhe mirësitë e saj nuk i njohin. Muslimanët nuk lejohen as me pështy në rrugë, e lërë më diçka tjetër.
Ama gjithsesi, duhet disa t’vërteta tjera:
- Mbetjet e iftarit GJITHMONË futen ne thasë dhe hudhen në koshin e plehrave (aty edhe ku duhet) ose dorëzohen tek personat ”përgjegjës”. Këta të fundit, meqë janë të papërgjegjshëm, i lënë ashtu pa i mbledhur e dorëzuar në deponitë e mbeturinave. Qentë pastaj, meqë janë të uritur e janë me dhjetra në Prishtinë si me qenë taksapagues të rregullt, vijnë dhe ua vështirësojnë pastruesve edhe më shumë punën duke krijuar këtë parregullsi.
- Lejen nuk e jepni ju nga mirësia dhe zemërgjerësia juaj, por sepse e keni OBLIGIM për çdo qytetar të këtij vendi që paguan taksa. Mos e bëni të duket sikurse jeni duke bërë ndonjë mirësi.
- Hapësira publike pastrohet prej jush, ndërsa ne të gjithë e dijmë sesi kundërmon Prishtina nga këto ”pastrimet tuaja”. Jeni JU pikërisht që e keni lënë në këtë gjendje.
- Para se të bëhet barrë për ta, është përgjegjësi e juaja dhe e tyre.
- Lista e zezë, gjobat e këto dënimet tjera që vijnë nga paaftësia juaj, a vlejnë për organizatorët tjerë, që jo vetëm këtë hapsirë por tërë qytetin e kanë ndotë? P.sh: Festën e birrës, nuk e kemi harruar.
- Çmimet në tavan, ndërsa puna në nivelin zero. Imazhi i Prishtinës është: Mbeturina çdokund, trafik i dendur, kundërmim në çdo rrugicë, drogë, kanalizime, parregullsi e vend pa parking. Mos kish me qenë më mirë me u ndreq disa probleme madhore, para se me ”ia futë” kacinë 10 thasëve me mbeturina?
- Kushdo që bën çfarëdo parregullsi, le të dënohet. Mirëpo, ”për dikë nënë, për dikë njerkë”, ssss, s’bën”. /tesheshi.com/
