BRUKSEL, 11 prill /ATSH-DPA/- Parlamenti Evropian miratoi dje rregullat e rrepta për migracionin dhe azilin në Bashkimin Evropian, pas disa vitesh mosmarrëveshjesh të brendshme dhe në sfondin e rritjes së kërkesave për azil në BE.
“Kanë kaluar më shumë se 10 vjet përgatitje. Por ne e mbajtëm fjalën”, tha presidentja e legjislaturës së BE-së, Roberta Metsola në X, dikur Twitter.
Në një konferencë për shtyp, Metsola foli për një paketë që mbron migrantët dhe lufton trafikantët dhe rrjetet që grabitin njerëzit më vulnerabël.
Çështja e migracionit të BE-së ka qenë një punë intensive – dhe ka nxitur një debat të ashpër – që nga viti 2015 kur një numër rekord migrantësh mbërritën në BE.
Një sistem solidariteti i detyrueshëm është baza e legjislacionit, që kërkon nga të gjitha shtetet anëtare të BE-së të marrin një formë përgjegjësie për menaxhimin e kërkesave për azil.
“Të gjitha vendet anëtare do të jenë pjesë e kësaj përpjekjeje solidariteti, por ato do të zgjedhin mënyrën më të mirë për ta bërë atë”, tha presidentja e Komisionit Evropian Ursula von der Leyen duke shpjeguar rregullat e reja në një konferencë për shtyp.
Nëse një vend i BE-së nuk dëshiron të pranojë personat që aplikojnë për azil, atëherë ai shtet anëtar duhet të japë ndihmë alternative si kontributet financiare për një fond mbështetës.
Gjithashtu, vendet anëtare të BE-së që përjetojnë rritje të konsiderueshme të kërkesave për azil mund të kërkojnë që aplikantët të shpërndahen në vendet e tjera të BE-së.
Pjesa më e diskutueshme e paketës përfshin krijimin e objekteve kufitare në BE për të pritur azilkërkuesit dhe për të kontrolluar dhe dërguar mbrapsht aplikantët që nuk janë të kualifikuar.
Derisa të merret një vendim për kërkesën për azil, njerëzit do të kalojnë deri në 12 javë në qendrat e pritjes në kufijtë e BE-së. //a.i/
