BRUKSEL, 19 shkurt /ATSH-DPA/- Ministrat e Jashtëm të BE-së miratuan sot vendosjen e një misioni detar të BE-së për të mbrojtur anijet nga militantët Houthi në Detin e Kuq.
“Ky është një mision në Detin e Kuq dhe deri në Gjirin e Adenit, i cili do të kontribuojë në lirinë e lundrimit,” u tha gazetarëve shefi i politikës së jashtme të BE-së, Josep Borrell pas takimit të ministrave.
I quajtur “Aspides” sipas fjalës greke “mburoja”, misioni detar përfshin dërgimin e anijeve luftarake evropiane dhe sistemeve të paralajmërimit të hershëm ajrore në Detin e Kuq, Gjirin e Adenit dhe ujërat përreth.
Anijet “Aspides” do të kenë urdhër vetëm të qëllojnë mbi militantët nëse ata sulmojnë të parët, dhe nuk do të autorizohen të qëllojnë paraprakisht. Komanda operacionale do të vendoset në qytetin grek të Larisës.
Militantët Houthi nga Jemeni kanë sulmuar anijet në rajon duke e arsyetuar si hakmarrje për veprimet ushtarake izraelite në Rripin e Gazës.
Ministrat e Jashtëm të BE diskutuan gjithashtu në takimin e tyre në Bruksel ndihmën ushtarake për Ukrainën.
Aktualisht, shtetet individuale anëtare të BE-së që ofrojnë ndihmë për Ukrainën drejtpërdrejt mund të kompensohen nga BE-ja përmes një mekanizmi financimi të quajtur Lehtësia Evropiane e Paqes (EPF).
Por, ministrat e Jashtëm janë ende duke luftuar për të rënë dakord për një marrëveshje alternative ku shtetet anëtare të prokurojnë një pjesë të ndihmës për Ukrainën së bashku përmes një shtesë prej 5 miliardë eurosh (5,4 miliardë dollarë) të buxhetit të EPF. //a.i/
