BRUKSEL, 3 prill /ATSH-DPA/ – Të gjithë anëtarët e NATO-s duhet t’i përmbahen zotimit të tyre për të shpenzuar 2% të Prodhimit të Brendshëm Bruto (PBB) për mbrojtje pasi është “mënyra më e mirë për t’u përgatitur për zgjedhjet në SHBA në vjeshtë”, deklaroi sekretari i Jashtëm britanik, David Cameron.
Cameron u kërkoi të gjithë anëtarëve të aleancës që të përmbushin premtimin e shpenzimeve ndërsa ai mori pjesë në një takim të NATO-s në Bruksel me homologët e tij nga e gjithë Aleanca.
Donald Trump, i cili ka të ngjarë të jetë kandidati republikan për president të Shteteve të Bashkuara në zgjedhjet e këtij viti, ka qenë një kritik i hapur i anëtarëve të NATO-s që nuk ia kanë arritur qëllimit.
“Gjëja më e rëndësishme që mund të bëjmë për të siguruar që kjo aleancë të vazhdojë të rritet dhe të forcohet është të sigurohemi që ne të gjithë të shpenzojmë më shumë se 2% të PBB-së tonë për mbrojtje. Shumë vende të tjera po e bëjnë këtë, por ne kemi nevojë që të gjitha vendet ta bëjnë këtë’’, shtoi ai.
“Sinqerisht, kjo është gjëja më e mirë për t’u siguruar që samiti i NATO-s në Uashington këtë verë të jetë një sukses, dhe është gjithashtu mënyra më e mirë për t’u përgatitur për zgjedhjet amerikane në vjeshtë, pavarësisht nga rezultati i tyre’’, theksoi ai.
Mbretëria e Bashkuar aktualisht shpenzon rreth 2.2% të PBB-së për shpenzimet e mbrojtjes, por kancelari Jeremy Hunt ka premtuar se kjo do të rritet në 2.5% “sapo të lejojnë kushtet ekonomike”. /os/
