BRUKSEL, 5 dhjetor /ATSH-DPA/ – Një vit pas vendosjes së një kufiri në çmimin e eksporteve të naftës ruse, Brukseli po punon për të forcuar më tej kufizimet.
Duke qenë se instrumenti i sanksioneve nuk ka qenë aq efektiv sa pritej, masat e monitorimit dhe kërkesat e dokumentacionit do të forcohen në Bruksel.
Kjo mund ta bëjë më të vështirë për kompanitë e transportit detar që të anashkalojnë sanksionet në të ardhmen.
Shtrëngimi i instrumentit të kufirit të çmimit duhet të vendoset deri në fund të vitit, si pjesë e raundit të 12-të të sanksioneve të BE-së për të shtrënguar ekonominë e Rusisë gjatë sulmit të saj ndaj Ukrainës.
Sanksionet e reja përfshijnë një propozim për të kufizuar tregtinë e diamanteve nga Rusia.
Kufiri i çmimit hyri në fuqi një vit më parë, së bashku me një ndalim të gjerë të importeve të naftës ruse në BE.
Qëllimi është të detyrojë Rusinë t’u shesë naftë klientëve në vendet e tjera për një maksimum prej 60 dollarë për fuçi.
Për eksportet në vendet jo anëtare të BE-së, shërbime të rëndësishme të transportit detar për eksportet e naftës ruse mund të ofrohen vetëm nëse çmimi i naftës së eksportuar nuk e kalon kufirin e çmimit.
Prandaj, kompanitë perëndimore të transportit mund të vazhdojnë të përdorin anijet e tyre për të transportuar naftë ruse në vende të tilla si India, Kina dhe Egjipti.
Rregullorja zbatohet edhe për shërbime të tjera të rëndësishme si sigurimet, asistenca teknike dhe financimi. //a.i/.
