Britania e Madhe ka thënë se planifikon të rrisë praninë e saj ushtarake në Evropën Veriore, duke përfshirë vendosjen e 20,000 trupave në rajon vitin e ardhshëm, për të ndihmuar në mbrojtjen e infrastrukturës kritike mes frikës në rritje të sabotimit rus, raporton Reuters.
Kryeministri britanik Rishi Sunak u takua më parë me zyrtarë dhe krerët e shteteve në një samit të bashkëpunimit të mbrojtjes që po mbahet në ishullin Gotland në Suedi.
Britania e Madhe do të dërgojë 20,000 ushtarë, marinarë, dhe pilotë në rajonin e Evropës Veriore, si dhe tetë anije të Marinës Mbretërore dhe një grup avionësh luftarakë dhe helikopterë ushtarakë.
Ata do të marrin pjesë në stërvitje me forcat e disa vendeve dhe do të kryejnë zbulim ajror, thanë agjencitë.
Një grup shtetesh nordike dhe baltike, si dhe Holanda dhe Britania e Madhe, u takuan në Suedi për një samit kushtuar bashkëpunimit në mbrojtje, disa ditë pasi një tubacion gazi dhe kabllo të dhënash u dëmtuan në Gjirin e Finlandës.
Zyrtarët finlandezë thanë se ishte rezultat i “aktivitetit të jashtëm” që nxiti shqetësimin në rajonin më të gjerë nordik.
“Këtë javë ne kemi parë edhe një herë se siguria jonë nuk mund të merret si e mirëqenë. Është e një rëndësie vendimtare që të jemi të bashkuar kundër atyre që kanë qëllime të këqija”, tha Sunak. /tesheshi.com/
