LONDËR, 9 dhjetor /ATSH-DPA/ – Ukrainasit po përballen me një rrezik vdekjeprurës nëse Perëndimi tërhiqet për mbështetjen financiare për rezistencën kundër forcave të presidentit rus Vladimir Putin, ka paralajmëruar zonja e parë e Ukrainës, Olena Zelenska.
Zelenska argumentoi se njerëzit në vendin e saj do të lihen të vdesin nëse bota lodhet duke ofruar mbështetje, në një intervistë me BBC.
Në një mision diplomatik në SHBA, sekretari i Jashtëm britanik, David Cameron, paralajmëroi republikanët amerikanë se bllokimi i mbështetjes së re financiare do të ishte një “dhuratë e Krishtlindjeve” për Putinin.
Republikanët në Kongresin e SHBA këtë javë bllokuan një projektligj kyç që do të kishte siguruar miliarda më shumë fonde për ndihmën ushtarake.
Aleatët perëndimorë po shqetësohen gjithnjë e më shumë për mbështetjen thelbësore për luftën kundër Rusisë mes mundësisë së kthimit të ish-presidentit Donald Trump në Shtëpinë e Bardhë.
Duke folur për emisionin kryesor politik të BBC-së të dielën, Zelenska tha se ”ne me të vërtetë kemi nevojë për ndihmën. Me fjalë të thjeshta, nuk mund të lodhemi nga kjo situatë, sepse nëse e bëjmë, vdesim”.
“Dhe nëse bota lodhet, ata thjesht do të na lënë të vdesim”, theksoi ajo./ a.jor.