BERLIN, 14 dhjetor /ATSH – DPA/ – Të paktën 17 gazetarë kanë vdekur gjatë mbulimit të luftimeve në Lindjen e Mesme që nga fillimi i tetorit, shumica prej tyre në Gaza, tha një grup për mbrojtjen e medias.
Globalisht, 45 profesionistë të medias janë vrarë këtë vit në lidhje me punën e tyre, tha Reporterët pa Kufij (RSF) në rishikimin e saj vjetor të lirisë së shtypit.
Ky është numri më i ulët që nga viti 2002, kur ndodhën 33 vdekje.
“Megjithatë, kjo nuk duhet të errësojë faktin se gazetarët paguajnë një çmim të lartë për shërbimet e tyre në çdo luftë. Që nga viti 2022, 61 gazetarë dhe punonjës të tjerë të medias kanë vdekur në mbarë botën’’, shton RSF.
Reporterët pa Kufij folën për një numër tepër të lartë në Gaza. Të paktën 17 punonjës të medias janë vrarë në lidhje me punën e tyre që nga 7 tetori, duke përfshirë 13 në Rripin e Gazës, një në Izrael dhe tre në Liban.
“Kjo e çon numrin e përgjithshëm të gazetarëve të vrarë në zonat e luftës këtë vit në 23, krahasuar me 20 vitin e kaluar,” thuhet në raportin e RSF. Sipas të dhënave, profesionistë të medias kanë humbur jetën edhe teksa raportonin për konflikte të armatosura në vendet afrikane Kamerun, Mali dhe Sudan, si dhe në Siri dhe Ukrainë.
“Rënia mund të shpjegohet pjesërisht dhe për disa rajone me një përmirësim në sigurinë e profesionistëve të medias. Ata tani janë përgjithësisht të trajnuar dhe të pajisur më mirë për të punuar në konflikte të armatosura”, theksoi RSF./ /os/
