Pedagog i marrëdhënieve ndërkombëtare në SHBA, Grid Rroji, teksa komentoi vizitën e Escobar në Tiranë bëri një sërë deklaratash të forta.
Rroji u shpreh në emisionin ‘Debat’ se në deklaratën e Escobar nuk përjashtohej ndonjë palë, ndërsa theksoi se Berishës, në luftën ndaj SHBA, do t’i bashkohet edhe Meta, ndërsa edhe Rama nuk është larg.
“Vizita e Escobar synon për përforcojë pozitat amerikane në rajonin strategjik. Unë gjykoj se interesat amerikane kanë të bëjnë me korrupsionin në përgjithësi. E gjithë paria e Tiranës është e korruptuar pa asnjë diskutim. Mesazhi që jepet është që SHBA e kanë vërtetë seriozisht problemin e korrupsionit.
Mesazhi është shumë i qartë për Foltoren, e cila ka shpalosur një antiamerikanizëm të shfrenuar dhe me shumë gjasë së shpejti do t’i bashkohen edhe lojtarë të tjerë si Ilir Meta. Mesazhi është aq i fortë edhe për kryeministrin Rama sepse loja e parisë së Tiranës gjatë këtyre dy viteve ka qenë e dyzuar. Është një lojë ku me fjalë shpërfaqet dashuria më e madhe për Amerikën, ndërsa me vepra mbahet një rrugë, dy ose tre me fuqi lindore, me të cilën shumë anëtarë të parisë kanë lidhje.
Gjatë fushatës, Meta mbante në njërin krah flamurin amerikan dhe në të tjetrin atë amerikan dhe jo më larg se dje bëri një deklaratë se rinia duhet të marrë në dorë fatet e vendit.
Escobar tha shumë qartë se korrupsioni është pjesë kyçe e strategjisë së SHBA. Deklarata e tij i drejtohet të gjithë klasës politike. Unë nuk pash të përjashtonte ndonjë palë. Paria e Tiranës punon bashkë. Berisha ka vënë fytyrën kundër interesave amerikane, nesër mund t’i bashkohet Meta. Megjithatë, nuk është shumë mbrapa edhe kryeministri Rama, i cili në takime premton, por ju tha se duhej të kthehej në Shqipëri dhe të mbante përgjegjësi”, u shpreh Rroji.
