STAMBOLL, 6 nëntor /ATSH-DPA/ – Sekretari amerikan i Shtetit, Antony Blinken ka takuar homologun e tij turk Hakan Fidan në Ankara për të diskutuar luftën në Gaza.
Sipas agjencisë së lajmeve AA, dy ministrat e shteteve të NATO-s u takuan sot në Ankara, pa asnjë plan për një konferencë të mëvonshme për shtyp.
Blinken nuk pritet të takohet me presidentin turk, Recep Tayyip Erdogan, i cili kohët e fundit dënoi veprimet e Izraelit në Rripin e Gazës duke i përshkruar si një “krim kundër njerëzimit”.
Izraeli ka bombarduar rëndë Rripin e Gazës që nga sulmet terroriste të Hamasit të 7 tetorit dhe thotë se trupat e tij tani kanë rrethuar qytetin e Gazës.
Turneu i Blinken ka përfshirë bisedime në Izrael, Jordani dhe Irak.
Në Izrael, Blinken premtoi mbështetjen e vendosur të Uashingtonit për Izraelin, ndërsa tha se ne duhet të bëjmë më shumë për të mbrojtur civilët palestinezë në Gaza./ /a.i/
