“Të nderuar qytetarë, ju uroj mirëseardhje në Qeverinë e RMV-së në seancën e parë konstituive të Qeverisë kalimtare të RMV-së”.
Kështu nisi seanca e parë e Qeverisë, me kryeministrin e ri teknik Talat Xhaferit. Kjo praktikë me video nga seanca e Qeverisë, nuk ka qenë shpesh e praktikuar deri më tani. Megjithatë, Xhaferi, shfrytëzoi rastin që t’i drejtohet opinionit dhe të përdor gjuhën shqipe. Zakonisht seancat e Qeverisë janë mbajtur në formë të mbyllur, për mediat dhe opinionin dhe më pas vetëm janë publikuar konkluzat.
Xhaferi deklaroi se pret që anëtarët e Qeverisë të punojnë me përkushtim dhe me interes për qytetarët.
Talat Xhaferi, kryeministër teknik
“Pres që të gjithë anëtarët e Qeverisë të investojnë gjithë diturinë dhe përvojën e tyre dhe të punojnë me përkushtim në interes të qytetarëve dhe se të gjitha sfidat para nesh do tejkalojmë bashkë, në mënyrë transparente dhe profesionale”.
Kryetari i Qeverisë teknike, Talat Xhaferi, para përbërjes së sapozgjedhur të Qeverisë, uroi zgjedhjen anëtarëve të Qeverisë dhe u dëshiroi punë dhe bashkëpunim të suksesshëm.
Emine Ismaili /SHENJA/
