Policia ka sekuestruar rreth 7 000 mjete piroteknike në rrethinën e Gostivarit dhe ka arrestuar tre persona. Siç njoftojnë nga Ministria e Punëve të Brendshme, nëpunësit policorë të Sektorit të Punëve të Brendshme Tetovë – Njësia policore Gallate, të martën kanë gjetur dhe sekuestruar gjithsej 6.964 mjete të ndryshme piroteknike, kryesisht pushkaliqe, në tri objekte tregtare në fshatrat e Gostivarit, Negotinë dhe Dobridoll.
MINISTRIA E PUNËVE TË BRENDSHME
“Përkatësisht, në periudhën prej orës 16:50 deri në ora 19:10, nëpunësit policorë e kanë privuar nga liria I.D.(61), të cilit i janë sekuestruar 3.826 mjete piroteknike dhe H.J. (49) me 2.895 mjete piroteknike , të dy nga Negotina, dhe e kanë arrestuar personin G.R. (60) nga Dobridolli me 243 mjete piroteknike të konfiskuara”.
Nga MPB shtojnë se mjetet piroteknike të gjetura janë fotodokumentuar dhe pas dokumentimit të plotë të rastit ndaj tre personave do të vijojnë parashtresat përkatëse.
Në lidhje me mjete piroteknike të cilat përdoren në festat e fundvitit, Ministri i MPB, Oliver Spasovski, disa ditë më parë deklaroi se dënimet do të jenë të larta dhe apeloi që mos të përdoren të njejtat.
Samir Mustafa /SHENJA/
