MOSKË, 3 maj /ATSH-DPA/- Rusia ka kritikuar ashpër presidentin francez, Emmanuel Macron dhe sekretarin e jashtëm britanik, David Cameron, pasi udhëheqësit perëndimorë rikonfirmuan mbështetjen e vendeve të tyre për Ukrainën.
Në një intervistë për “The Economist”, Macron tha se ai nuk do të përjashtonte dislokimin e trupave franceze për të ndihmuar Ukrainën në luftën e saj me Rusinë.
Zëdhënësi i Kremlinit, Dmitry Peskov dënoi deklaratën e Macron si “shumë të rrezikshme”, duke thënë se rrit rrezikun që Franca të përfshihet drejtpërdrejt në konflikt.
Cameron gjithashtu u kritikua nga Kremlini pasi njoftoi një ndihmë vjetore prej 3 miliardë paund (3,8 miliardë dollarë) për Ukrainën gjatë një vizite dje në Kiev.
“Ky është një përshkallëzim i drejtpërdrejtë i tensioneve në Ukrainë, i cili potencialisht mund të përbëjë një kërcënim për sigurinë evropiane”, tha Peskov duke iu referuar njoftimit të Cameron.
Ai njoftoi se Rusia do të vazhdojë operacionin e saj special ushtarak në Ukrainë derisa të arrijë qëllimet e saj. //a.i/