Zëdhënësi i LSDM-së, Darko Kaevski, i ka bërë thirrje opozitës që të votojnë në Kuvend propozimin francez. Ai garanton qytetarët maqedonas, se me propozimin e fundit evropian do të kenë një gjuhë të pastër maqedonase në Bashkimin Europian, pa shtesa dhe fusnota, ndërsa identiteti maqedonas është i tërë.
Kaevski deklaroi se Kuvendi, tempulli i demokracisë, është vendi i duhur për të marrë vendim lidhur me konkluzionet për propozimin e fundit evropian për fillimin e negociatave me BE-në.
DARKO KAEVSKI-ZËDHËNËS I LSDM-SË
“Duhet përgjegjësi dhe mençuri nga të gjithë deputetët, kjo është çështje mbipartiake. Fakti që VMRO-DPMNE dhe Mickoski po ikin nga debati për çështje kaq të rëndësishme për të ardhmen e qytetarëve tanë dhe të vendit tonë tregon se ata kanë frikë nga e vërteta, kanë frikë se të gjitha gënjeshtrat dhe trillimet e tyre do të dështojnë”.
Ndërkaq,deputeti i VMRO-DPMNE-së, Dragan Kovaçki, theksoi se Qeveria duhet urgjentisht ta refuzojë propozimin francez.
DRAGAN KOVAÇKI-DEPUTET I VMRO-DPMNE-ES
“Mbështetja masive e përditshme e intelektualëve, ekspertëve të integrimit në BE, artistëve, mjekëve, juristëve, pjesëtarëve të forcave të sigurisë, pra nga mbarë populli maqedonas, është sinjal i qartë se çfarë duhet të bëjë qeveria e Kovaçevskit. Qeveria duhet ta refuzojë urgjentisht këtë propozim, të cilin në fillim pretendoi se e refuzoi, për ta pranuar më pas duke pretenduar seka bërë një lloj konsultimi me ekspertë të vetëshpallur të qeverisë që paguhen pikërisht nga qeveria, pra nga populli”.
Sipas Kovaçkit, në 8 ditët e fundit populli maqedonas i ka thënë qartë JO propozimit asimilues dhe poshtërues që bllokon integrimin e Maqedonisë në BE.
Samir Mustafa /SHENJA/
