Vendimi i ministrit të Shëndetësisë, Rifat Latifi i marrë gati para 10 ditësh për rikthimin e
shërbimit të Kardiologjisë Invazive tek Kardiologjia, duke e shkëputur kështu nga Kardiokirurgjia është i papranueshëm për mjekët invaziv.
Ndaj 13 kardiologë invaziv i kanë nisur të enjten një shkresë zyrtare kryeministrit, Albin Kurti.
Specialistët të përfaqësuar nga një zyrtar ligjor po kërkojnë shfuqizimin e statutit me ndryshim, që parasheh që këta të jenë nën kupolën e kardiologëve.
Mes tjerash thuhet se ky vendim është bërë pa konsultimin e tyre dhe atë publik gjë që sipas tyre është e kundërligjshme.
Veprimi siç thonë ata është arbitrar dhe se rrezikohen shërbimet kardiologjike invazive.
E, si zgjidhje më të mirë, ata e shohin krijimin e Institutit të Sëmundjeve të Zemrës.
Mirëpo, kardiologët pohojnë se kanë pasur shumë telashe gjatë kohës sa invazivët ishin të ndarë nga ta.
Ndaj Klinika e Kardiologjisë e ka mirëpritur vendimin e ministrit.
Kujtojmë se në 2017 ishte hera e fundit kur invazivët iu ri-bashkëngjitën Klinikës së Kardiokirurgjisë.