MOSKË, 28 gusht /ATSH-DPA/- Nuk ka pasur rritje të niveleve të rrezatimit në centralin bërthamor në Zaporizhia pas bombardimeve të fundit rreth zonës së pushtuar nga Rusia, njoftuan sot autoritetet në Kiev dhe Moskë.
“Situata e rrezatimit mbetet normale”, tha Ministria ruse e Mbrojtjes në Moskë, duke i bërë jehonë një deklarate të ngjashme nga operatori bërthamor shtetëror ukrainas “Enerhoatom”.
Për javë të tëra, të dyja palët kanë akuzuar njëra-tjetrën për bombardimin e kompleksit, duke rritur frikën për një katastrofë në centralin më të madh bërthamor në Evropë.
Moska tha sot se dje kishte pasur dy sulme të tjera artilerie. Njëra predhë goditi pranë reaktorit numër gjashtë, tjetra në një stacion pompimi që ofron ftohje.
Pretendimet në fushën e betejës të bëra nga Kievi dhe Moska nuk mund të verifikohen në mënyrë të pavarur.
“Pasi centrali bërthamor u shkëput përkohësisht nga rrjeti elektrik i Ukrainës të enjten pas një mbylljeje emergjente, dy njësi janë vendosur sërish në linjë”, sipas “Enerhoatom”.//a.i/
