STAMBOLL, 3 janar /ATSH-AFP/ – Inflacioni arriti në 64,8% nga viti në vit në Turqi, sipas të dhënave zyrtare të publikuara sot.
Rritja e çmimeve të konsumit, e nxitur veçanërisht nga zhvlerësimi pothuajse i vazhdueshëm i lirës turke, shënoi 2,9% gjatë një muaji.
Inflacioni, i cili ka rifilluar rritjen e tij që nga qershori, qëndroi në 62% në nëntor.
Rritja e çmimeve ka të bëjë veçanërisht me produktet ushqimore (+72%), transportin (+77,1%), shëndetin (+79,6%), arsimin (+82%) si dhe hotelet dhe kateringun (+93,2%), sipas Institutit turk të Statistikave.
Ndonëse të larta, shifrat zyrtare kundërshtohen nga ekonomistët e pavarur në Grupin e Kërkimit të Inflacionit (ENAG), të cilët llogaritin rritjen e çmimeve të konsumit me 127,2% nga viti në vit.
Në këtë kuadër, paga minimale u rrit me 49% më 1 janar, për të arritur në 17 000 lira turke ose afërsisht 520 euro.
Banka Qendrore Turke, e cila ka rritur normën e saj bazë nga 8,5% në 42,5% që nga qershori, në një përpjekje për të frenuar inflacionin, vlerësoi në fund të dhjetorit se shtrëngimi monetar është “afër nivelit të kërkuar për të vendosur kursin e deflacionit”./ a.jor.