Njëri prej drejtuesve të grupimit të së djathtës ekstreme “Proud Boys” u dënua me 17 vite heqje lirie, masa më e lartë kjo e caktuar deri më tani për trazirat e 6 janarit 2021 në Kongresin Amerikan.
Joe Biggs, mbështetës i ish-presidentit Donald Trump, u shpall fajtor për akuzën e nxitjes së dhunës në Capitol Hill. Pavarësisht se u shfaq i penduar në sallën e gjyqit për veprim e tij, e u lut për butësi, vendimi në fund qe i ashpër për të. Një tjetër anëtar i Proud Boys, u dënua të enjten me 15 vjet burg, gjithashtu me akuzën e komplotit dhe konspiracionit.
Donald Trump ndërkohë përballet edhe vetë me telashe të mëdha ligjore. Ish-presidenti amerikan deklaroi të enjten se është i pafajshëm ndaj akuzave të prokurorëve në shtetin e Xhorxhias, sipas së cilave ai u përpoq të përmbyste rezultatin e zgjedhjeve presidenciale të vitit 2020 në atë shtet.
Deklarimi i pafajësisë u bë me shkrim dhe iu dorëzua Gjykatës së Lartë të Qarkut Fulton në Xhorxhia. Kjo nënkupton që zoti Trump, kandidati kryesor republikan për president për zgjedhjet e vitit 2024, nuk do të paraqitet personalisht në gjykatën e Atlantës javën e ardhshme për t’u përballur me akuzat.
Prokurorja e Qarkut Fulton, Fani Willis, ka përfshirë në akt-padinë e saj ndaj ish-presidentit Donald Trump, 13 akuza për vepra penale, përfshirë për shantazh, presion ndaj zyrtarëve të shtetit shtetërorë për të përmbysur rezultatin e zgjedhjeve të vitit 2020 në favor të tij, ndërkohë që ishte rivali i tij Joe Biden që fitoi në atë shtet, si edhe dyshime se ka krijuar një listë të rreme zgjedhësish për të minuar certifikimin në kongres të fitores së presidentit Biden.
Top Channel
