TEL AVIV, 14 prill /ATSH-DPA/- Izraeli po peshon me kujdes veprimet e tij pas sulmit të madh nga Irani, tha sot ministri i Jashtëm Israel Katz në një intervistë për radiostacionin e ushtrisë izraelite.
“Ne kemi thënë: nëse Irani sulmon Izraelin, ne do të sulmojmë Iranin. Dhe ky angazhim është ende i vlefshëm”, tha Katz.
Megjithatë, Katz tha se çështja specifike e një përgjigjeje të mundshme do të diskutohej në kornizën e duhur nën kryesimin e kryeministrit Benjamin Netanyahu.
Ministri i Jashtëm shprehu besimin se do të merren vendimet e duhura dhe të sakta.
Media izraelite njoftoi se kabineti i luftës do të mblidhej sot në orën 15:30 për të diskutuar hapat e ardhshëm. //a.i/.
