Shënoi pas 336 ditësh, sulmuesi meksikan premton të mos ndalet më

by admin
Spread the love

Sulmuesi meksikan Raul Jimenez u rikthye te goli pas plot 336 ditësh dhe e bëri këtë në transfertën ndaj Southamptonit, teksa pasi i shpëtoi mbulimit të mbrojtësve vendas, dërgoi topin në rrjetë, duke i dhënë tre pikët skuadrës së Wolves.

Futbollisti 30-vjeçar meksikan, që shënoi 30 gola në dy sezonet e tij të parë me “ujqërit”, pësoi një dëmtim të rëndë më 29 nëntorin e vitit të kaluar ndaj Arsenalit dhe u rikthye në fushat e lojës vetëm në mesin e muajit korrik.

Por ndonëse kishte luajtur si titullar në sfidat e para të këtij sezoni në kampionatin anglez, nuk ia kishte dalë të dërgojë topin në rrjetë dhe e bëri këtë pikërisht pasditen e djeshme, ndërsa festa për golin e tij ishte vërtetë e çmendur në pankinë e Wolves.

“U ndjeva shumë mirë për golin, pasi po luftoja dhe po punoja shumë që të shënoja. E dija që shumë shpejt do të shënoja sërish dhe ky gol ishte vërtetë i veçantë, pasi ishte i pari që prej atij dëmtimi të rëndë, që më mbajti larg pasionit tim për shumë muaj. Për këtë gol nuk festova vetëm unë, por e gjithë familja ime, shokët e ekipit, mjekët, fizio-terapistët, stafi teknik e ai drejtues. Të gjithë më qëndruan pranë në momentet më të vështira dhe dua t’ua shpërblej me shumë gola të tjerë në vijim”, deklaroi sulmuesi meksikan pas ndeshjes.


Top Channel

You may also like