Vetëm tri ditë pas marrjes së pozitës së ushtrueses së detyrës së Shërbimit Spitalor Klinik Universitar të Kosovës, Pranvera Zejnullahu-Raçi, nënshkroi vendimin e parë.
Firmën e dha në kontratën e drejtorit të ri të Klinikës së Gjinekologjisë, Zef Ndrejaj.
Burimet e Klan Kosovës bëjnë me dije se kjo u bë pa u kryer procesi i shqyrtimit të ankesave. Në fakt, në këtë rast ishte vetëm një, ajo e kundër-kandidatit, Atdhe Keqa.
“Nënshkrimi i kontratës për drejtorin e Klinikës së Gjinekologjisë është bërë pas rekomandimit të Zyrës së Personelit në QKUK, se kontrata duhet të nënshkruhet, meqë kanë përfunduar të gjitha procedurat e ankimimit dhe palët janë njoftuar lidhur me çështjen“, deklaruan nga Shërbimi Spitalor Klinik dhe Universitar i Kosovës.
Mirëpo, ndryshe thonë në Komisionin e Ankesave.
Kjo trupë jozyrtarisht ka treguar se tek gjatë kësaj fillimjave ka bërë shqyrtimin e ankesës së gjinekologut Keqa, i cili nuk iu kishte nënshtruar intervistës për këtë pozitë.
Edhe vetë Keqa e ka konfirmuar për Klan Kosovën se ankesa e tij është shqyrtuar me datën 9 gusht dhe përgjigjja i është përcjellë në Klinikën e Gjinekologjisë më 10 gusht, pra pasi që kontrata i është lëshuar drejtorit Ndrejaj.
