Sëmundja e refluksit gastroezofageal është një çrregullim i tretjes që prekë shumë veta, sidomos afër Krishtlindjeve dhe Vitit të Ri për shkak të ushqimeve të shumta në tryezë.
Shoqata Amerikane e Ushqyerjes dhe Dietetikës ofron këshilla për trajtimin e sëmundjes së refluksit gastroezofageal. Sëmundja e refluksit gastroezofageal është një problem i zakonshëm që lidhet me stilin e jetesës dhe dietën moderne. Urthi dhe ndjesia e pakëndshme e refluksit të acidit në ezofag janë ankesat më tipike të njerëzve me GERD.
“Ushqyerja luan një rol kyç në menaxhimin e GERD. Disa ushqime dhe zakone të të ngrënit mund t’i përkeqësojnë simptomat, ndërsa të tjerat mund të ofrojnë lehtësim dhe të përmirësojnë cilësinë e përgjithshme të jetës”, tha zëdhënësja e shoqatës Julie Stefanski, një dietologe e regjistruar në Baltimore.
Refluksi ndodh kur acidi i stomakut kthehet në ezofag, duke shkaktuar simptoma të tilla si urth, dhimbje gjoksi, nauze ose të vjella.
Për të përballuar shqetësimin, administrohen medikamente që reduktojnë sekretimin e acideve gastrike. Sipas dietologes Julie Stefanski, këshillat më praktike për ata që duan të shmangin GERD janë:
-Shmangni ushqimet që shkaktojnë ose përkeqësojnë simptomat si mente, çokollatë, alkool, kafeinë, ushqime acidike dhe pikante.
-Hani vakte të vogla dhe të shpeshta gjatë ditës për të ulur presionin në stomak dhe ezofag.
-Kufizoni ushqimet me yndyrë dhe yndyrat e shtuara duke zgjedhur proteinat nga mishi pa dhjamë, shpendët, peshku, tofu dhe fasulet, si dhe zierja në avull.
“Duke bërë zgjedhje të informuara dietike dhe duke punuar me dietologun e tyre, të sëmurët mund të fitojnë kontroll më të mirë të simptomave të tyre të GERD dhe të shijojnë një jetë më të rehatshme dhe më të kënaqshme”, përfundoi Julie Stefanski.
Top Channel
