Kremlini ka reaguar ‘ i tërbuar’ pasi një organ qeveritar polak këshilloi përdorimin e një emri tjetër për enklavën ruse të Kaliningradit në bregun e Detit Baltik.
Komiteti polak tha se qyteti dhe zona më gjerë duhet të quhen Królewiec. Ky ishte emri tradicional i zonës, tha ai, dhe vendimi për të mos përdorur më një “emër të imponuar” ishte pjesërisht rezultat i pushtimit të Rusisë në Ukrainë.
Rusia tha se vendimi ishte “kufi me çmendurinë” dhe “një akt armiqësor”.
“Ne e dimë se gjatë historisë, Polonia ka rrëshqitur herë pas here në këtë çmenduri të urrejtjes ndaj rusëve”, tha zëdhënësi i Kremlinit, Dmitry Peskov.
Për qindra vjet përpara Luftës së Dytë Botërore, zona njihej si Königsberg dhe ishte pjesë e Prusisë Lindore. Królewiec është përkthimi polak i Königsberg.
Megjithatë, pas Luftës së Dytë Botërore, qyteti dhe rajoni më gjerë u vunë nën administrimin sovjetik. Sovjetikët e quajtën atë Kaliningrad sipas Mikhail Kalinin, një nga udhëheqësit e revolucionit bolshevik.
Kaliningrad është strategjikisht i rëndësishëm për Moskën, sepse strehon Flotën Ruse Balltike në portin e Baltiysk dhe është një nga portet e vetme evropiane të Rusisë pa akull.
Ai tha se emri Kaliningrad nuk kishte lidhje as me qytetin dhe as me rajonin dhe kishte një rezonancë “emocionale dhe negative” në Poloni.
Mikhail Kalinin ishte një nga gjashtë nënshkruesit e Byrosë Politike Sovjetike të urdhrit për të ekzekutuar më shumë se 21,000 të burgosur polakë të luftës në pyjet e Katinit dhe gjetkë në vitin 1940.
Pushtimi rus i Ukrainës dhe përpjekjet e saj propagandistike e kishin shtyrë Poloninë të rivlerësonte “emrat e imponuar” të diskutueshëm, shtoi komiteti.
“Çdo vend ka të drejtë të përdorë në gjuhën e tij emra tradicionalë që përbëjnë trashëgiminë e tij kulturore, por nuk mund të detyrohet të përdorë emra të papranueshëm prej tij në gjuhën e tij,” tha komiteti.
Moska fillimisht fajësoi nazistët për Masakrën e Katinit kur gjermanët zbuluan varret masive në 1943.
Për shkak se Moska vendosi një regjim komunist në Poloni pas Luftës së Dytë Botërore, të afërmit e viktimave nuk ishin në gjendje të diskutonin publikisht ose të zbulonin asgjë rreth krimit për pesë dekada. Rusia e pranoi përgjegjësinë e saj për masakrën vetëm në vitin 1990.
Megjithëse rekomandimi i komitetit shtetëror nuk është i detyrueshëm, pritet që organet shtetërore polake tani t’i referohen Kaliningradit si Królewiec. Ministria e Jashtme e Polonisë ka lëshuar një vlerësim pozitiv për ndryshimin e emrit.
Ushtria polake ka ngritur një gardh të përkohshëm me tela rroje 2.5 metra të lartë dhe muajin e kaluar filloi punën për instalimin e kamerave dhe sensorëve të lëvizjes përgjatë kufirit 232 km. Në pikat kufitare janë vendosur edhe pengesa antitank.
Zyrtarët polakë janë të shqetësuar se Rusia mund ta përdorë atë kufi si një rrugë të re emigrantësh për në BE, pas raporteve për rritje të fluturimeve direkte nga Lindja e Mesme dhe gjetkë për në Kaliningrad.
Polonia ka ngritur një gardh çeliku 5.5 metra të lartë përgjatë një pjese të kufirit të saj me Bjellorusinë, pas një rritjeje të numrit të emigrantëve që kalojnë nga atje në Poloni, Lituani dhe Letoni.
Top Channel
